زجل فوق الغمام
فوق بها السما فوق الغمام
ندى يكلل جبين بلسم رهام
وكل صبح يهب وينسم هوى
بيوجعني النوى بفرش ونام
بتذكر أيامنا بهاكي الكروم
شوكنت مغروم بحلو الكلام
كل صبح بفيق وهمي رفيق
بنطر عالطريق والفرقه حرام
بكتب قصيدي بدم وريدي
بتغص تغريده وتنشف الأقلام
تعى ياروح الروح تعى نلتقي
ألك أنا اشتكي واضرب سلام
إيدك بإيدي يحلا حلا ترديدي
ينتشي وريدي تصدق الأحلام
تعي نغني قدود ونسهر بحلب
عز الطلب ياقلب يا مال الشام
تعي ضمك ودفيكي من البرد
واقطفلك الورد ليش الخصام
طفلك أنا بالهوى ونحن سوا
ريقك دوا والهجر والله حرام
تعي نرقص نغني ارفقي وحني
صليني صلي بلكي ترجع الأيام
تعي رافقيني مشوار عالحواكير
من فرحتي نطيرنقطف هالغرام
مافي متل الحب يقرب هالقلوب
حاجي رجل لاورا ورجل لقدام
أنا وأنتي حكاية حب ما بتنتهي
وأهلي وأهلك ناس جواد وكرام
إهداء بقلمي
